چهارشنبه ۹ مرداد ۱۳۹۸ - ۱۳:۰۹
کد خبر55334

ولی فقیه ین شرقی آذربایجان داکی نماینده سی:
شهری اداره ائدن تشکیلاتلارین وظیفه سی انقلابین ایکینجی آدیمیندا بوتون امکانلاری عادلانه پایلاماقدیر

آل هاشم

ولی فقیه ین شرقی آذربایجان داکی نماینده سی دئدی: شهری اداره ائدن تشکیلاتلارین انقلابین ایکینجی آددیمیندا چتین وظیفه لری وار. بو چتین وظیفه بوتون امکلاناتی عدالتلی صورت ده بوتون همشهری لرین آراسیندا پایلاماقدیر.

حجت الاسلام والمسلمین سید محمد علی آل هاشم (همایش شهر پایدار و گام دوم انقلاب) «داواملی شهر و انقلابین ایکینجی آددیمی کنفرانسیندا» دئدی: ایندی شهرلریمیزده معمارلیق باخیمیندان قاریشیق لیق و هویت سیزلیک گورونور. بیز شهرلریمیزه معمارلیق هویتی وئرمک اوچونُ اسلامی – ایرانی معمارلیغا داها آرتیق اهمیت وئرمه لییک.

آل هاشم دئدی: معمارلیق مسئله سی موقتی و موضعی سلیقه لردن یوخاریدا اولونمالی دیر. شهرلریمیزده کی معمارلیق مدنی فرهنگی اقتصادی و اجتماعی معمارلیق لا اویغون و متناسب اولمالی دیر.

حجت الاسلام و المسلمین آل هاشم سوزلرینین داوامیندا آرتیردی: موجود واقعیت لره اساسلاناراق شهر معمارلیغینین فکری و مدنی فرهنگی چرچیوه سینی تدوین و اجرایی ائتمک اولار. بو معمارلیق چرچیوه سی تبریزه مخصوص اولان بوتون معمارلیق مکتب لری و سبلک لری ایله متناسب اولمالی دیر.

ولی فقیه ین شرقی آذربایجان داکی نماینده سی سوزلرینین داوامیندا عدالتی محوریت ده قرار وئرمک و یوخسول و محروم انسانلارا داها آرتیق توجه ائتمه یی جمهوری اسلامی نین اساس و باش هدف لریندن بیلیب بو اساس دا شهرین حاشیه لرینده یاشایان انسانلارا جدی توجه و ماراق گوسترمه یی ایسته دی.

آل هاشم دئدی: اسلامی نظام دا پول و ثروت قازانماق جرم دئییل و حتی بو ایش تشویق ائدیلیب آما تبعیض رانت و غیرقانونی اقتصادی فعالیت لردن حمایت ائتمک شدتله قینانیب و قاداغان ائدیلیب دیر. عینی حالدا محروم و یوخسول انسانلاردان دا حمایت ائتمه مک هئچ بیر بهانه یه دایانمایاراق قبول ائدیلمز.

‍ ولی فقیه ین شرقی آذربایجان داکی نماینده سی سوزلرینین سونوندا انقلابین معظم رهبرینین یئددی توصیه سینین محقق اولماسی اوچون تازا طرح لره احتیاج اولدوغونو دئییب آرتیردی: بو هدف لره چاتماق اوچون شهرلریمیزین تاریخی و سنتی هویتینه قایتمالییق.

ارسال نظر

شما در حال ارسال پاسخ به نظر « » می‌باشید.
4 + 6 =